فوائد الصيام العكسي للريجيم

 #ريجيم

الصيام العكسي في هلبة ناس مايعرفوشي هذا👇 توضيح ليه

الصيام العكسي : ناس واجد مفهومهم للنظام هذا غلط❌

ف البداية خلينا نحكو ع الطريقة الصحيحة للنظام هذا

أول شي كلنا نعرفو المقولة المشهورة (أفطر ملك تغدى أمير تعشى فقير)

الصيام العكسي يطبق المقوله هذي .تمام .

من أسمه صيام عكسي يعني تاكل طول اليوم و تجي عند وقت معين و تمنع الأكل ، حلوو!.

خلينا نعطو أمثلة للصيام العكسي بالطريقة الصحيحة✔

أول شي لو أنت أحتياجك في اليوم  1500 كالوري كيف حتقسم الوجبات ع مدار يومك بطريقة صحية!!؟🤔

ركزو شن قلت "طريقة صحية"

يعني نظام اهم شي فيه الفطور عشان ميجينش حد يقولي ليش الكالوري ف الفطور أعلا من الغداء ؟؟؟

شن قلنا نحن !أفطر "ملك"💗

باهي ليش المفروض نفطر بكميات كبيره هكي!؟؟

لانك مدخلتش لجسمك أكل لمدة تتراوح ما بين15 ل 20 ساعة و زيد عليها جسمك طول ليل يشتغل و يحرق ف أكيد حيحتاج غِذاء💕

المهم...

أول شي و أهم شي زي م قلنا وجبة الفطور المفروض متكونش يحتوي على اكثر من 600 كالوري مثلا خلينا نقولو (كوب حليب خالي الدسم + 3 تمرات + شريحتين توست شعير + بيضتين مسلوقات + طرف جبنة مثلثات + تفاحة + خيارة و طماطة متوسطة الحجم)

هذا يعتبر فطور مثالي و صحي للصيام العكسي يحتوي على 550 كالوري و يحتوي على جميع العناصر الغذائية من فات و بروتين و كارب و فيتامينات💗

نجو للغداء ناخذو مش اكثر من500كالوري

(100 جرام رز + 100جرام صدر دجاج مشوي + سلطة +شربة خضروات + 4 كواشيك فاصوليا )

 هكي عندك460كالوري ف الغداء💗💗

لو انتي من الناس لي تجوع بعد الغداء تقدر تنقص 50 كالوري من الفطور و 50 من الغداء و تاخذهم في سناك بعد الغداء بساعتين ...تمام

نجو للعشاء!؟؟🤔

لا يا حلوة أسمه صيام عكسي مفش عشاء في فطور و غداء فقط و لازم يكونو بكميات مناسبة عشان وزنك ينزل بطريقة صحية💗

هكي انتي خذيتي 1010 كالوري يعني لو تلتزمي بالنظام هذا بدون اي تمارين رياضية حتلقا روحك ف الاسبوع حرقت3500 كالوري يعني نقصتي نص  كيلو دهون و حطي ستين الف خط تحت كلمة دهون طبعا بدون جوع بدون حرمان نزول وزن بطريقة صحية بدون م يطيح شعرك بدون م تخرب بشرتك💕

و لو تبي تنقصي اكثر مثلا كيلو امشي 7الاف خطوة ف اليوم  ما يعادل ساعة ، ع ما اعتقد ساهل المشي مش محتاج مجهود و خليه بعد الفطور افضل عشان متهضمش الغداء و تقعد جعان😂💕.

نجو للمفهوم الخاطئ عند بعض الأشخاص .

شفت اللي ماشي ع النظام هذا بأكل دايت و حرمان و وجبات صغيرة ف الفطور و الغداء و حتى مانع الكارب و فوقها يتريض!!؟

 شفت اللي ياكل وجبة وحدة ف اليوم و برضو مانع عنصر من اهم العناصر الغذائية و شفت اللي ينصح التاني و يقوله امنع البروتين راه مش حيسببلك اي اعراض جانبية؟؟

قصدي من جدكم!؟؟🤔

حنحكي ع كل الحالات بصفة عامة اول شي ع نظام الحرمان لي أنت ماشي عليه هذا خلينا متفقين ان وزنك حينزل اوك!؟

بس زعما شن حينزل من وزنك! حتنقص دهون و عضل و أمية و سلملي ع الترهل🙂💔

حتخش في مرحلة حرمان و أنيميا و اول م حتوقف دايت و ترد لأكلك الطبيعي حتكتسب وزن و ترد زي الاول و مرات أسمن و حتاكل بشراهه و بكميات كبيرة صدقني مش حتقدر تتحكم في نفسك حتبدا خاطرك حتى ف الدحي المقلي . حيبدا عندك مشاكل ف البشرة و تساقط شعر و نقص فيتامينات ف جسم و لخبطة هرمونات نتيجة لنظامك الغير صحي لي التزمت بيه فترة طويلة عشان تنقص ف الاسبوع 5 كيلو..

و الناس لي ياكلو وجبة وحدة ف اليوم . خليني نقوللكم حاجة اتديروها ممكن تقتنعو .

 دير تحليل in body و التزم بنظامك اسبوع او اسبوعين و عاود دير التحليل مرة تانية حتلقا الكتلة العضلية نقصت عندك بشكل يخوف .

و نحب نقوللكم راهو الدايت نظام حياة مش حرمان لان صدقني حتفرح بنزول الوزن شوية و ف النهاية حتقلب بنتيجة عكسية💔 

حاولو يكون اكلكم صحي و متوازن و متحرموش ارواحكم من حاجة كولو كل شي بسس بطريقة صحيةة💗